sexta-feira, 20 de abril de 2012

MASIVO SEGUIMENTO DA FOLGA DE ESTUDANTES POLO NOSO IDIOMA

Masivo seguimento da folga estudantil convocada hoxe no ensino medio para exixirlle a Feijóo que cese "nos seus ataques contra o galego"
As organizacións convocantes destacan o paro como un "xesto de responsabilidade e compromiso" do alumnado co futuro do galego e pídenlle a Feijóo que "escoite a contudente mensaxe" enviada hoxe "en forma de ducias de aulas baleiras"
Sara Seco, responsábel nacional das Mocidades da Mesa: "A pesar de que a TVG nos censure e a Xunta queira facer como que non existimos, a de hoxe está a ser unha nova 'xornada histórica' en defensa do galego"
As organizacións convocantes da folga estudantil de hoxe so o lema "Paremos os ataques contra o galego" consideran o paro "un éxito", falan de "folga masiva" na práctica totalidade da xeografía do país e dan os "parabéns" a todo o alumnado que hoxe secundou a xornada reivindicativa demostrando "comprimiso e responsabilidade" co futuro da lingua propia de Galiza.
Segundo os datos que ao longo da mañá foron recollendo A Mesa pola Normalización Lingüística e a súa sección xuvenil, a Mocidade pola Normalización Lingüística; os Comités; a Liga Estudantil Galega e o Sindicato de Estudantes, é posíbel falar dun seguimento mesmo superior ao 80% entre o colectivo do alumnado chamado á folga: 2º ciclo da ESO, bacharelatos e ciclos formativos, tanto de grao medio como superior.
Cun apoio á convocatoria que mesmo en moitos centros chegou ao 100%, as organizacións convocantes salientan que esta estea a ser unha folga "secundada por igual" na práctica totalidade de Galiza, sen grandes diferenzas xeográficas. De feito, a repercusión foi desde primeira hora da mañá "moi significativa" en moitos institutos das sete cidades, especialmente en Vigo, Santiago de Compostela, A Coruña, Ourense ou Ferrol, porén tamén en moitas vilas pequenas e medianas.
As entidades convocantes da folga estudantil sinalan que esta tamén foi unha xornada reivindicativa secundada "sen grandes diferenzas" en función da etapa educativa, pois os datos falan dun seguimento "moi elevado" tanto no 2º ciclo da ESO como nos cursos de Bacharelato ou nos ciclos formativos. Cómpre sinalar que, na maioría dos casos, os datos achegados polos equipos directivos dos centros adoitan incluír no cómputo o alumnado do 1º ciclo da ESO, que non estaba chamado a secundar a folga.
A convocatoria de paro de hoxe, que tamén contou co apoio das organizacións xuvenís Galiza Nova, área de Mocidade de Esquerda Unida e Mocidade Nacionalista Galega (MNG), non incluíu no inicio concentracións ou outras accións reivindicativas na rúa. Porén, nalgúns casos organizáronse pequenos actos simbólicos "en defensa do dereito a aprender e a estudar en galego" nas entradas dalgúns institutos. Tal foi o caso en localidades tan dispares como Vigo ou A Fonsagrada.
Aínda que moitas das aulas dos centros de ensino medio de Galiza permaneceron desertas durante toda a mañá, as organizacións convocantes sinalan que redes sociais como twitter foron un auténtico "fervedoiro" de mensaxes e mencións de apoio á convocatoria a través do uso do hashtag #19Aestudantespologalego, a inmensa maioría provenientes de estudantes en folga, mais tamén de persoas doutras idades que non quixeron perder a ocasión de solidarizarse co estudantado que hoxe se mobilizou masivamente.
A Mesa e as súas Mocidades, os Comités, a Liga Estudantil Galega e o Sindicato de Estudantes pídenlle a Alberto Núñez Feijóo e ao seu goberno que "conxuguen o verbo escoitar" e que "tomen nota da clara mensaxe que hoxe lles foi trasladada en forma de ducias de aulas baleiras".

terça-feira, 17 de abril de 2012

FOLGA DE ESTUDANTES O 19 DE ABRIL: PAREMOS OS ATAQUES CONTRA O GALEGO

Organizacións estudantís convocan folga no ensino medio o vindeiro 19 de abril para "parar os ataques contra o galego"
Os convocantes denuncian que o uso do galego no ensino está mesmo por baixo do 20% en boa parte dos centros
A Mesa e as súas mocidades, os Comités, a Liga Estudantil Galega e o Sindicato de Estudantes advirten que o de Galiza é o único sistema educativo de todo o Estado onde se prohibe impartir determinadas materias na lingua propia
A Mesa e a súa sección xuvenil, a Mocidade pola Normalización Lingüística, xunto coas organizacións estudantís Comités, Liga Estudantil Galega e Sindicato de Estudantes, convocan unha folga estudantil no ensino medio para o vindeiro 19 de abril en defensa do "dereito a aprender en galego".
Co lema central da convocatoria "Paremos os ataques contra o galego" e o hashtag nas redes sociais #19Aestudantespologalego, as organizacións convocantes do paro estudantil denuncian o "gran retroceso" que está a padecer a lingua propia nas diferentes etapas educativas desde a entrada en vigor do mal chamado decreto para o plurilingüismo do goberno de Núñez Feijóo.
"Case dous anos após a súa implantación, faise moi evidente que este foi e segue a ser un decretazo contra o galego", sosteñen as organizacións impulsoras desta folga do alumnado, que denuncian que na maioría dos casos o uso real do galego nas aulas está "moi por debaixo" da teórica marxe 33-50% (dependendo do grao de interodución da lingua estranxeira) garantida legalmente e que en moitos centros "nin sequera chega ao 20%" sobre o total das horas semanais impartidas.
Os convocantes do paro tamén denuncian como "especialmente preocupante" a "precaria" situación do galego en moitos dos ciclos formativos e no ámbito das ensinanzas especiais ou na Educación Permanente de Adultos (EPA). "O galego non se emprega nas aulas e nin sequera existen materiais ou recursos de apoio na nosa lingua", sinalan.
Outro dos motivos da chamada á folga será exixir do goberno de Núñez Feijóo que "poña fin á prohibición" de impartir as materias de Matemáticas, Física e Química e Tecnoloxía en galego, como estabelece o actual decreto ao sinalar que esas materias deberán ser ministradas en castelán. As organizacións convocantes do paro estudantil recordan que o galego é o único sistema educativo dun territorio do Estado con lingua propia que "prohibe" o uso desta en determinadas áreas e consideran "impresentábel" que desde o executivo autonómica se diga que todo funciona con "normalidade". "Para a Xunta, ‘normalidade' é sinónimo de laminación do galego", aseveran.
Na folga estudantil do vindeiro 19 de abril, que será de toda a xornada, está chamado a participar o alumnado do 2º ciclo da ESO, Bacharelato, Ciclos Formativos, EPA e Ensinanzas Artísticas e Especiais.
As organizacións convocantes iniciarán nos próximos días unha intensa campaña a través das redes sociais e nos propios centros, porén sinalan que esta irá "alén da data da folga" e comprenderá tamén un chamado á participación activa de todo o estudantado na manifestación convocada para o vindeiro 17 de maio en Santiago de Compostela pola Plataforma Queremos Galego.