PIDEN A DIMISIÓN DO VALEDOR DO POBO E DO CONSELLEIRO DE EDUCACIÓN

O DEFENSOR DO POBO, BENIGNO LÓPEZ, INSTOU Á RETIRADA DUN LIBRO POR DICIR QUE O GALEGO É A LINGUA PROPIA DE GALICIA
Segundo informacións de prensa, o Valedor do Pobo atendeu unha petición do grupo político UPyD e o Conselleiro de Educación, Jesús Vázquez, vai ordenar á editora do libro a corrección do texto. Organizacións de defensa da lingua como Queremos Galego, Prolingua e a Mesa pola Normalización Lingüística, manifestaron publicamente a súa sorpresa e indignación ante a censura dun libro que se limita a reproducir literalmente o artigo 5.1 do Estatuto de Autonomía de Galicia.

Por este motivo esixen o cese do Valedor do Pobo e do Conselleiro de Educación e teñen convocadas concentracións de protesta ante o que consideran un exemplo máis de persecución contra o noso idioma. Carlos Callón, portavoz da Mesa, cualificou os feitos de “auténtico acto de censura” e “sistemática caza de bruxas” que o actual goberno está a exercer contra a lingua e a cultura do país. Prolingua sinala no seu comunicado “que o Valedor do Pobo (…) ignore os contidos do Estatuto de Autonomía, parece un absurdo, mesmo cómico” e que esta situación é “un esperpento ao que non é allea a actitude pasiva, cando non agresiva, fomentada polo actual goberno galego”.
As concentracións vanse celebrar o xoves 15 as 11’30 diante da sede do Valedor do Pobo e o sábado 17 ás cinco da tarde na Praza do Toural en Santiago de Compostela. Tamén solicitan o envío de correos individuais á presidenta do Parlamento e ao presidente da Xunta segundo os modelos que se poden descargar nas súas páxinas Web (pódese acceder a eles nas ligazóns desta mesma páxina).

A Mesa pide explicacións ao Valedor do pobo

Carlos Callón: “Estamos a vivir unha auténtica caza de bruxas contra a nosa cultura"
A Mesa transmite a súa solidariedade coa editora e pide que se deixen de criminalizar a lingua e a cultura de Galiza
A Mesa pola Normalización Lingüística exixe ao Valedor do Pobo que ofreza “explicacións inmediatas, públicas e claras” sobre a veracidade de que reclamou a retirada dun libro de texto porque reproduce o artigo 5.1 do Estatuto de Autonomía, que sinala que a lingua propia de Galiza é o galego. O presidente da Mesa, Carlos Callón, considera que “de ser certo, volveremos a reclamar aos tres partidos do Parlamento a destitución de Benigno López, que máis unha vez demostraría que non está capacitado para exercer un cargo de consenso e que mellore a convivencia”.
A Mesa recorda que os problemas do actual Valedor do Pobo coa lingua galega “chegaron xa desde o día seguinte da súa desafortunadísima elección, en que demostrou que non era o Valedor do Pobo, senón o Valedor do PP”. Carlos Callón apunta que a “fobia obsesiva contra a lingua galega” de Benigno López xa provén “dos seus tempos de maxistrado, cando se negaba a utilizar o topónimo A Coruña” e que na entidade en defensa da lingua a viven “cada semana, cando o Valedor se nega a tramitar a inmensa maioría das queixas que lle remitimos por vulneración da lexislación favorábel ao noso idioma”.
Callón lamenta que situacións de “persecución contra a cultura galega” se poidan estar a vivir en pleno século XXI. “Primeiro o goberno de Núñez Feijóo realizou a maior destrución de libros en galego desde o ano 1936 e agora queren prohibir un manual escolar porque reproduce o que di o Estatuto; isto é demasiado”, considera o portavoz da maior asociación cultural de Galiza, que non dubida en adxectivar o contexto como unha “caza de bruxas contra

Prolingua: A lingua propia de Galicia é o galego

Artigo 5.1 do Estatuto de Autonomía de Galicia:
A lingua propia de Galicia é o galego.

Que os contumaces inimigos da lingua galega traten de borrala de calquera manifestación da vida social non resulta nada sorprendente. E que en ocasións teñan apoios explícitos dalgunhas institucións que teñen entre as súas obrigas a de promover unha maior presenza social da lingua, tampouco. Mais que o Valedor do Pobo -de ser certa a información que hoxe ofrecen Atlántico Diario, Faro de Vigo e ABC-, o responsable de velar polo cumprimento da lexislación que temos, ignore os contidos do Estatuto de Autonomía, parece un absurdo, mesmo cómico se non fose pola trascendencia do cargo e das súas decicisións. Un esperpento ao que non é allea a actitude pasiva, cando non agresiva, fomentada polo actual Goberno galego.

Desde ProLingua esiximos unha rectificación inmediata e pedimos a dimisión dun Valedor do Pobo que con esta resolución mostra a súa incompetencia para o cargo e unha teima probada contra a lingua propia de Galicia (así denominada no Estatuto de Autonomía, o mesmo que dá razón de ser ao posto cuxos preceptos máis básicos incumpre con frecuencia).

O Concello de Ames pretende suprimir o Servizo de Normalización Lingüística

Desde a Coordinadora de Traballadores/as de Normalización da Lingua (CTNL) coñecemos a proposta do goberno municipal de Ames de eliminar o Servizo de Normalización Lingüística do concello, suprimindo a praza da Relación de Postos de Traballo (RPT) municipal, proposta que consideramos extremadamente grave e irresponsábel.

O Servizo de Normalización Lingüística (SNL) do Concello de Ames vén desenvolvendo desde hai anos un labor fundamental no municipio, coa organización de importantes accións que van desde a acollida lingüística e integración da poboación inmigrante ata o desenvolvemento de campañas de fomento do galego no comercio ou a hostalaría, a organización de cursos de lingua para o conxunto da poboación ou o desenvolvemento de múltiples actividades dirixidas á poboación escolar, como obradoiros, concurso, etc., ademais de traballar pola calidade lingüística e comunicativa da institución. En definitiva, moitas e importantes accións para o imprescindíbel labor que unha administración pública debe facer para o fomento do uso e prestixio da lingua galega. Así, non é a única función deste SNL a formación lingüística do funcionariado, como sinala o concello na súa argumentación.

Tamén é falso que o SNL dependa de subvencións, como sinala o propio Concello, xa que é un servizo estrutural inserido no organigrama e cun posto de traballo que forma parte da relación de postos de traballo municipal, aínda que si é certo que a Xunta de Galicia eliminou as subvencións para o mantemento de SNL, algo que desde a CTNL xa denunciamos no seu momento e que tamén fai responsábel á administración autonómica desta grave situación.

Polo tanto, é fundamental que este SNL siga desenvolvendo o seu traballo como ata agora e que o goberno desbote canto antes esa proposta de eliminalo.

Guía de termos de Dereito Penal en Galego

A Universidade de Santiago de Compostela acaba de editar unha guía de termos esenciais de dereito penal, o traballo lexicográfico máis amplo sobre esta disciplina en galego que existe na actualidade, e que foi realizado Xusto R. Río e Miguel Abel Souto

O volume toma o Código penal como a fonte principal dos conceptos xurídicos que despois se presentan en versión bilingüe. Para facilitar a consulta diferéncianse dúas partes, unha cun corpus de entradas bilingües numerado e ordenado segundo o nome galego e un índice alfabético de denominacións castelás.

Esta obra introduce xa as novas figuras delitousas incorporadas na reforma do código español do 22 de xuño de 2010.

Os Termos esenciais de dereito penal –que poden descargarse dende o web do SNL, que á vez incorporou as entradas ao seu bUSCatermos- dálle continuidade á colección de glosarios especializados que se puxo en marcha a primavera pasada cos Termos esencias de dereito constitucional e que continuarán proximamente con dous novos.

A guía enmárcase dentro da campaña Témoslle Lei, o Plan para aumentar e mellorar o uso da lingua galega entre o estudantado e o profesorado da Facultade de Dereito.

Novo conxugador verbal en liña:Cilenis

O CilenisConxugador, unha nova ferramenta lingüística en liña, permite conxugar de maneira fiábel calquera verbo da lingua galega, incluso neoxolismos como twittear ou calquera outro aínda que non veña nos dicionarios

Cal é a terceira persoa do plural do pretérito pluscuamperfecto do verbo haber? Como se conxuga o futuro dun verbo que aínda non recollen os dicionarios, como tuitear? A resposta xa está na rede. Cilenis vén de lanzar a máis completa ferramenta en liña para conxugar verbos de maneira automática: o CilenisConxugador. É un dos primeiros produtos desta novísima empresa galega, centrada en ofrecer solucións innovadoras nos ámbitos do procesamento da linguaxe natural e a enxeñería lingüística.

O CilenisConxugador (http://conxugador.cilenis.com/) é a aplicación máis completa, fiábel e versátil existente para conxugar de maneira automática calquera verbo en lingua galega. Permite conxugar os verbos que forman parte do Vocabulario Ortográfico da Lingua Galega (VOLG) e tamén calquera outro verbo que se nos ocorra: neoloxismos, tecnicismos, localismos, verbos dunha xerga ou incluso inventados.

Este conxugador está baseado no sistema de código aberto conshuga, desenvolvido na Universidade de Santiago de Compostela polo grupo de grupo de investigación ProLNat@GE (Grupo para o Procesamento da Linguaxe Natural), do que procede o equipo de traballo de Cilenis. O resultado é unha ferramenta con importantes aplicacións no ámbito da educación, a comunicación e a empresa.

Tamén en portugués
Conxuntamente coa versión galega, Cilenis desenvolveu un conxugador verbal en portugués, dispoñíbel desde xa para os máis de 240 millóns de falantes desta lingua no mundo. A empresa galega sitúase así en primeira liña na creación de ferramentas lingüísticas on line no ámbito lusófono cunha ferramenta que mellora as existentes ata agora.

O CilenisConjugador (http://conjugador.cilenis.com/) permite consultar verbos nas catro variantes do portugués: portugués europeo e portugués brasileiro, en cada caso antes e despois do acordo ortográfico. Tamén neste caso é posíbel optar por conxugar infinitivos presentes nos léxicos portugueses e brasileiros ou facelo con calquera verbo, incluso inventado.

Abrindo camiño no campo da enxeñería lingüística
O conxugador é un dos primeiros produtos que lanza Cilenis, nacida en maio deste ano. Trátase dunha empresa spin-off creada por membros do grupo de investigación ProLNat@GE da USC. Cilenis ofrece produtos e solucións avanzadas nos campos do procesamento da linguaxe natural e a enxeñería lingüística.

Cilenis traballa no desenvolvemento tecnolóxico aplicado aos recursos lingüísticos, para desenvolver ferramentas en galego, portugués, castelán, inglés e francés. É un ámbito de mercado que aínda non fora explorado en Galicia e con importantes perspectivas de futuro. Por iso foi premiado en xuño deste ano co primeiro premio XI Concurso de Proxectos Empresariais Innovadores da Universidade de Santiago.

En galego triunfamos

AS ALMAS DO FENTAL

O monte é noso (1978) Llorénç Soler

GALICOLA convoca o 3º Concurso Ángelo Casal

Galicola é un projeto de economía social que destina os seus beneficios á normalización da lingua galega. Este ano convoca unha nova ediçom do seu concurso que leva o nome do que fora alcalde galeguista de Santiago durante a 2º república española e fusilado en 1936. Está dirixido a entidades que promoven o uso e defensa do galego.

Bases para a apresentaçom de candidaturas

-Nom se aceitarám candidaturas de empresas com ánimo de lucro.

-Nom se aceitarám candidaturas de entidades que empreguem o espanhol.

-Nom se aceitarám candidaturas de entidades que promovam valores reacionários como o racismo ou o sexismo.

-Nom se aceitará mais de umha candidatura por entidade.

-Nom se aceitarám candidaturas de entidades que tenham ganhado o prémio o ano anterior.

-As candidaturas entregarám à Galicola umha apresentaçom do destino a que dedicarám o prémio, com extensom nom superior à duas folhas. Essa apresentaçom será divulgada nesta página web para o seu conhecimento polos participantes no Concurso.

-O prazo de recepçom de candidaturas fecha-se em 31 de dezembro. Nom se aceitarám candidaturas fora de prazo.

Eleiçom dos projetos ganhadores

No 31 de janeiro publicará-se a listagem de candidaturas admitidas por Galicola, e exporám-se os seus projetos na página web da Galicola.

O Concurso resolverá-se por votaçom popular. De 31 de janeiro a 1 de maio cada consumidor de Galicola poderá votar polos projetos que prefera, enviando umha etiqueta do refresco com o seu voto. Nom há limite aos votos que cada pessoa queira enviar. Poderáse votar tanto por correio postal, quanto em urnas instaladas em centros sociais e locais por todo o país. No 17 de maio, Dia das Letras Galegas, abrirám-se as urnas e procederáse ao reconto de votos e à proclamaçom do projeto ganhador.

Concurso de minicontos do xornal De Luns a Venres e o Centro Pen Galicia

Minicontos de Luns a Venres para fomentar a lingua

Coa finalidade de contribuír a unha maior presenza da literatura galega nos medios, e para achegar os/as autores/as aos/ás lectores/as da prensa, o xornal De Luns a Venres e o Centro Pen Galicia convocan o concurso de minicontos de Outono

BASES

1. Os traballos deberán ser inéditos na súa totalidade, escritos en lingua galega, segundo a normativa vixente, e de libre temática.
2. A extensión de cada relato non poderá exceder os 1.200 caracteres (sen contar espazos).
3. Cada autor ou autora ten a opción de concursar cun máximo de tres minicontos, aínda que só un deles poderá ser seleccionado polo xurado.
4. Os participantes enviarán os seus orixinais ao enderezo electrónico minicontosoutono@l-v.es, ou por correo postal a: LV. Rúa de Fernando de Casas Novoa 35A, 1.º B. 15707. Santiago de Compostela.
5. O prazo de admisión rematará o 15 de decembro de 2011.
6. Estabelécense tres premios: o primeiro dotado con 600 €, o segundo con 300 € e o terceiro con 100 €.
7. O resultado do certame farase público a finais de decembro de 2011, e os minicontos gañadores serán publicados no xornal LV e na súa edición dixital. Posteriormente o PEN de Galicia e o LV organizarán un acto literario, no transcurso do cal se fará entrega dos premios.
8. O xurado cualificador está composto por un xornalista representante de LV, un escritor membro do Centro PEN Galicia e outras tres persoas relacionadas co ámbito da literatura galega. Correspóndelle ao xurado a aplicación e interpretación destas bases e a súa decisión será inapelábel.

ORGANIZAN: De Luns a Venres e Centro PEN Galicia
COLABORA: Secretaría Xeral de Política Lingüística da Xunta de Galicia